لا علاقة بين الديموقراطية و بين العلمانية
فالاتحاد السوفييتي كان دولة علمانية لكنه ليس ديموقراطيا
و الصين دولة علمانية لكنها ليست ديموقراطية

العلمانية المطبقة في العالم الغربي هي العلمانية الليبرالية
و لم يدعي أحد أن سوريا علمانيتها هي علمانية ليبرالية

نقطة أخرى
الأمور كلها نسبية
فمثلا
فرنسا دولة أكثر علمانية من أسبانيا
لكن اسبانيا في نفس الوقت هي دولة علمانية

أنت قبل ما تسأل عن مفهوم العلمانيه وتتهكم على الماهيه الضايعه جربت تسأل حالك عن مفهوم الاسلام ؟ بلش من الاسلام- الشرعي- , وانتهي بالاسلام -السياسي – فيك تعطيني صوره واضحه متفق عليها هالمليار مسلم , أو حتى هال 17 مليون مسلم بسوريا ؟ وهي بفرض نزعنا هال 2 مليون مسيحي من الديموغرافيه السوريه , بدون ما ادخل بالتفاصيل اللي بتحتاج لصفحات من الكتابه الجواب المعروف هو انو حتى الاسلام الطاسه تبعتو ضايعه .

لنفرض انك رح تقلي انت عم تجاوب على السؤال بسؤال وهاد تهرب من نقاش الفكره الاساسيه , الجواب عليك بكون او الفكره السابقه كانت رد على فرض انك انت – او غيرك ازا ما كنت انت – عم تطرح مفهوم سوريا الاسلاميه كجل .

النقطه التانيه اللي غصت وتوسعت بتحليلها هيي الاختلافات بين العلمانين نفسون على تحديد مفهوم العلمانيه وانو يا أخي اتفقوا على مفهوم محدد وخلصونا .
أنا ماعم افهم شو دخلو العلماني السوري بالحجاب والصلبان والالحاد وب أتاتورك وبفرنسا وبريطانيا انو ليش هالخربطه صايره معك !!؟
أنت متخيل بيوم – وهون شيلك من بعض الجالات الفرديه المريضه – انو يطلع تجمع علماني سوري ويطالب بمنع الحجاب بالجامعات والعمل مثلا !!!
أقصى طلبات العلمانين السوريين من نوعيه , انو أمام الجامع يعلم الناس الاخلاق ويتركلي فلانه ليش مانها محجبه وعلتان ليش ما قطعولو ايدو لأنو سرق .
وازا بدون يتخنوها ممكن يطالبو بتنظيم الدعاره أو السماح بالزواج المدني . وازا شي واحد فيون حب يزور بيت خالتو بيحكي شويه عن الديمقراطيه .

الفوضى او التطرف “العلماني” اللي عم تشوفو بالعالم وتقراه بالاخبار ما بيحقلك تعملوا اسقاط على مجتمع شرقي الو خصوصيتو متل المجتمع السوري . من البديهي يكون لكل دوله ظروف ولكل مجتمع حدود .

النقطه التالته لحضرتك كانت انو الناس بسوريا عموما صارت تتحس من كلمه العلمانيه وترفض تلقائيا اي شي بيرتبط بهاد المصطلح .
للأسف كلامك صحيح وحتى الاقليات ” اللي بالظاهر عندك مشكله ما معون” صار عندون رفض للعلمنه أما عن الاسباب
فحضرتك ذكرت نصف الحقيقه وهي التصرفات الأخيره اللي تابعوها الناس بدول متل فرنسا الخ , النصف التاني بيرجع انو التيار الديني بالمجتمع ومتل عادتو دحش حالو بالنص واخد موقف وصار الشيخ ما بيشعر حالو أدى رساله الاسلام ألا ازا طلع المصلين من الجامع محقونين وكرهانين شي اسمو علمانيه , الفكره هون مو بأنو انا عم دافع عن جهه معينه بس ليش لحتى نسنتخدم الدين كوسيله لحتى نحزب الناس ونلعب بقرارات لازم يكونو هنون أصحابها !!؟

بعدين هالنقطه عم تذكر حضرتك بعض الايجابيات الموجوده حاليا بسوريا وانو أنت بتفتخر فيها وبتأيد العلمانيه ازا كانت بتقتصر على هيك أمور .
مباشره بعدها عم تذكر القراء انو هالايجابيات موجوده بالمجتمع السوري منذ الازل وانو الشعوب الشرقيه ما وقعت بنفس المأساه اللي وقعت فيها اوروبا تحت حكم الكنيسه الخ ,

طبعا هاد كلو كلام بلا مضمون ولا أساس , كلام صادر من عاطفتك على الاغلب في حال الو أساس مقروء وحضرتك مستند على مراجع معينه فبيئسفني قلك انو الكتب بلا مصداقيه كتب من نوعيه – باب الحاره – معموله لتجمل الواقع والماضي وبس وبدون ما خوض كتير بهلموضوع تاريخ الدوله السوريه بالقرن العشرين لحالو فيه كذا حادثه صدام طائفي اسلامي اسلامي – اسلامي مسيحي . هاد غير كم هائل من المشاكل الاجتماعيه والسياسيه .
وكلامي هاد ما بيعني ابدا انو الوضع الحالي أفضل , لأنو هالايجابيات اللي عم تحكي عنها هيه احدى الايجابيات القليله للحذاء العسكري , وعندك العراق دوله بجوار سوريا ومجنمع مشابه – مو متل فرنسا – على زمن الحكم العسكري السابق كان المجتمع العراقي هادئ عموما وبلا محاصصه طائفيه او صدامات والكل شاف بالاهبار كيف انقلب الوضع 180 نتيجه للاحتلال اللي ازاح الصبات العسكري من المعادله فدخل الدين بالسياسه وكانت النتيجه اللي عم نشوفو .

ومنشان انو نحنا كشعوب شرقيه او أمه اسلاميه ما وقعنا بفخ مشابه للحكم الكنسي فبرجع بقلك راجع التاريخ من مصادرو الحياديه ورح تشوف انو رغم الهاله الخارجيه الحلوه اللي نقلوها المؤرخين العرب بالداخل موجود عفن راكبو ركب لهلتاريخ , كتير من الابداعات الادبيه والفلسفيه منعها وحاربها الحكم الديني وسجن فلاسفه واتهمون بالزندقه وكتير من الجرائم والاطماع السياسيه اعتمدت على الدين لتنجح بالبدايه ولاحفا لحتى يتم تبريرها .

بالنهايه حضرتك عم تقسم العلمانين العرب تقسيم انا شايفو غريب عجيب وحاولت افهم على شو مستند ما عرفت .. المهم هيك رأيي :

- أولا ضائع الهويه وفاقد الثقه بكون دائما انسان متذبذب , ضعيف بين قوسين هايف , والهايف ممكن ينهوس بمطرب يقلدو بحركاتو وحياتو بس بعمرو ما بيتبنى فكر سياسي , اجتماعي معين وبيدافع عنو أمام الناس خصوصي ازا كان هالشي خارج السرب وحدو الانسان القوي والواثق من حالو القادر يعمي هاد الشي .

- سوريا تتميز عن باقي الدول العربيه – وانا هون عم بحكي عن اطلاع مو لمجرد الكلام -بحس المسؤوليه , والعقلانيه بطرح الافكار والمحاوله الدائمه للبعد عن الصدام عند كتير من المفكرين والمثقفين لكن اللي صاير انو الاعلام ما بيطوش الناس والناس نفسون ما بيحبو يصيرو مثقفين ويقرو غير لما فلان بينزل مقال ليحرك الصوره من حولو ويعمل يجدل يسمع فيه اسم دكتور او مفكر ليرضي عقدو , وازا فرضنا انو فلان متطرف فالتطرف كمان موجود عند مفكرين الاسلام والمسيحيه واليهوديه وهو حاله طبيعيه بتنشأ مع أي فكره بهلكون وحتى أي مجتمع ديمقراطي راقي فيه يمين ووسط ويسار .

- كلامك بالنسبه للمغتربين بوافقك عليه , كتير منون اخد اجكام سريعه عملها حقايق وصار ينظر فيها .

- باخر فكره عندك عم ترجع من جديد تستلم هالطائفيين اللي من الاقليات , انا هون بدي قلك شغله الاقليات بأي مجنمع حساسه , ابن الاقليه ممكن يرد على فكرتك بعصبيه مو لانو طائفي – حتى لو كان طائفي – عصبيتو هيي خط اول للدفاع لأنو دائما داخلو عندو اجساس انو مهدد .

هو مابدو رجل الدين يتدخل بالسياسه مو لأنو الزلمه حاقد على طائفتك بقدر ما هو خايف على حالو , من منطلق انو اليوم حكا بالسياسه بكرا بيحكم السياسه وبيفرض عليي شي ما برضاه . وعموما نادرا ما بهاجم ابن الافليه طائفه ابن الاكثريه او بيتدخل بمعتقداتو , الهجوم والمضايقات دائما بتصدر من الاكتريه وعندك ايران مثال واضح على هالشي , بعمرون الاقليات بايران من اقليه السنه للاقليه البهائيه الخ مارح يحصلو على حريات دينيه او سياسيه او حتى انسانيه الا ازا اتطبق نظام حكم يفصل الدين عن الدوله وبيعتمد مبدأ المواطنه .

و شكرا .